Nagpahayag an JYP Entertainment kan Nobyembre 20 na mapahingalo asin temporaryong naka break muna si Chaeyoung, miembro kan sikat na K-Pop girl group na TWICE, makalihis ining ma-diagnose nin vasovagal syncope.
Segun sa opisyal na statement, tinawan si Chaeyoung nin rekomendasyon kan mga doktor na magpahingalo makalihis an serye nin medikal na pagsusuri.
Pinagtibay pa kan sumunod na evaluations na kaipuhan kaini nin mas halawig na panahon para makarekober, kaya padagos an saiyang pagpauktaba sa trabaho hasta matapos an taon.
Sinaysay man kan JYP na tutugutan pang magpartisipar si Chaeyoung sa mga upcoming schedules alagad “limited” na sana, asin posible man na dae na maka-attend sa iba pang event.
Susog sa Harvard Health Publishing, an vasovagal syncope nangyayari kun nasosobrahan an reaksyon kan vagus nerve—na nagko-kontrol kan heart rate asin blood pressure—huli sa mga trigger siring kan stress, dehydration, o pagdonar nin dugo.
Huli sa saiyang kondisyon, dae makakaiba si Chaeyoung sa TWICE World Tour na naka-iskedyul sa Kaohsiung, Hong Kong, asin Bangkok.
Segun sa JYP, dismayado si Chaeyoung sa sitwasyon alagad nagpaabot pa nin pagpadangat sa mga fans para sa mga event asin konsiyerto na dae kaini nadumanan.
An pahayag nag-abot mantang padagos an TWICE sa saindang “THIS IS FOR” world tour, na kaakibat man kan paglunsar kan saindang ikaapat na full-length album na This Is For.
Antes an opisyal na anunsyo, nagperform pa si Chaeyoung kaiba an grupo sa Philippine leg tour sa Philippine Arena kan Oktubre 4.
