Mapakuriyat an Philippine National Police (PNP) nin 15,097 pulis para sa seguridad kan “Trillion Peso March” anti-corruption rallies sa Nob. 30, sigun ki PNP spokesperson Brig. Gen. Randulf Tuaño kan nakalihis na Miyerkules.
Ma-deploy an NCRPO nin 8,805 pulis mantang 6,292 pa an gikan man sa Special Action Force asin manlaenlaeng regional police offices.
Babantayan kan pulisya an mga pangenot na lugar kan protesta siring kan People Power Monument, EDSA Shrine, Mendiola, Ayala Bridge, J.P. Laurel Street, Recto Avenue asin nagkapira pang lugar sa palibot kan Malacañang.
May deployment man sa Senado, Kamara asin sa tanggapan kan Independent Commission for Infrastructure. Naka-secure na nin permit an mga organizer tangani gamiton an White Plains Avenue magpuon 6 a.m. hasta 6 p.m., kasina an sarong memorandum of understanding na nagsisiguro na mayong “seditious” statements sa programa.
Makalihis an kadahasang nangyari kan primerong Trillion Peso March kan Set. 21, nakaantabay an mga specialized unit siring na sana kan negotiation teams, medical teams, arresting officers, asin legal asin investigation groups.
Naka-heightened alert an Metro Manila police asin magfu-full alert pag abot nin Nob. 28.
Sinaysay ni NCRPO chief Maj. Gen. Anthony Aberin na pwedeng i-adjust an deployment basado sa real-time na crowd assessment.
Nagsasagibo man nin koordinasyon an PNP sa mga lokal asin pambansang ahensya, nagpakusog nin real-time CCTV monitoring asin nag-intensify nin social media tracking.
Pagirumdom pa kan PNP, ipinagbabawal pa man an mga gibuhong may kinaraman sa rebelyon, insureksiyon, sedisyon o pagbubusol nin kariribokan sa irarom kan Batas Pambansa 880 asin Revised Penal Code.
