Dae soboot makakapagkawat nin lampas sarong semana si NBA superstar Stephen Curry makalihis ining magkaigwa nin panibagong minor quad injury.
Marurumduman kan Nobyembre 27 dae na tinapos ni Cury an pagkakawar sa nagin laban kan Golden State Warriors asin Houston Rockets makalihis an magkasurunod na pagbangga ki Rockets forward Alperen Sengun asin Amen Thompson.
Sa pigsagibong MRI, nagluwas na mayong major structural damage sa quad ni Curry alagad kaipuhan kaining magsarairarom sa pirang aldaw na pagpaparahay.
Huli sa saiyang injury, dae muna makakapagkawat an NBA superstar sa mga nakatalaan na laban kan saiyang koponan hasta sa enot na semana kan Disyembre.
Dae man hahalion an posibilidad na mas mahaloy pa an saiyang recovery asin pupwedeng mabwelta na sana ini sa pagkakawat pag-abot kan Disyembre-18 kun saen nakatalaan labanan kan Golden State an Phoenix Suns.
Nakatalaan man na hampangon kan GS an New Orleans Pelicans ngunyan Nobiyembre-29 mantang sa Disyembre-2 makakahampang kaini an defending champion na Oklahoma City Thunder, an top team sa NBA na may 18-1 record.
Sa presente, nasa 10-10 an win-loss record kan GSW asin nasa pang-walong pwesto sa western conference. Sa nakalihis na sampung kawat kan koponan, lima sana an naipagana kaini.
