Ipinagsugo kan top US Navy commander an ikaduwang round kan military strikes sa soboot Venezuelan drug boat. Kinumpirmar ini ni White House Press Secretary Karoline Leavitt.
Dinepensaran kan White House official an nagin lakdang ni US Navy admiral Frank Bradley na alinsunod ini sa saiyang awtoridad asin sa ley.
Kinumpirmar man ni Leavitt na inotorisa ni US Secretary of War Pete Hegseth an nasambitan ng military strikes alagad dae nagtao nin direktiba na gadanon an gabos siring na sana kan napabareta.
An ikaduwang strikes an napabareta na inilunsar makalihis makasalbar sa inisyal na pagsabog an duwang katao asin kumakapit sa nasusulo na barko.
Parehas man nagpahayag nin pagkabahala an mga Republican asin Democratic lawmakers katakod sa mga ulat asin nagpromisa nin imbestigasyon sa nasambitan ng pag-atake.
Pighurot man ni White House Press Secretary Leavitt na nilinaw ninda US President Donald Trump asin Sec. Hegseth na an mga iniuri komo narco-terrorist groups an subject kan nakakagadan na pag-atake alinsunod sa mga ley kan digmaan.
May karapatan man soboot an US President na halion an mga ini kun sinda an nagkakawsa nin banta sa Amerika.
Kan mga nakalihis na man na semana, pinalawig pa kan US an military presence kaini sa Caribbean asin nagkasar nin mga serye kan lethal strikes sa mga pinagtutubudang drug-smuggling boats sa international waters sa may Venezuela asin Colombia komo parte kan inaapod kaining anti-narcotics operation na nag gadan sa labi sa 80 katao magpuon kan primerong parte kan bulan nin Setyembre kan presenteng taon.
