Nagpahiling nin mahewasang pagkakasararo an 97 na lehislador gikan sa Metro Manila asin Mindanao makalihis ipahayag an bilog asin pusog na suporta ki Speaker Faustino “Bojie” Dy III, na saindang pigtatawan-pugay sa pagbubusol kan integridad asin katatagan sa hababang kapulungan.
Sa Metro Manila, 30 sa 33 district representatives an nagpirma sa pahayag na nagbibisto sa mahinahon asin maprinsipyo na pamamayo ni Dy, orog na sa tahaw kan kontrobersiyang kawsa kan katiwalian sa flood control projects. Pig-omaw man ninda an pag-usad kan 2026 national budget asin an pagbusol ni Dy sa pagbilog kan Independent Commission Against Infrastructure Corruption asin Anti Dynasty Bill.
Kasabay kaini, nagluwas man nin suhay na manifesto an 67 Mindanao lawmakers na nagpahayag kan saindang “firm asin unwavering support” para sa Speaker.
Binanggit ninda an pangangaipuhan kan pusog asin predictable na liderato tanganing magtinir an katuninongan, kauswagan asin kredibilidad kan mga institusyon.
An Metro Manila asin Mindanao blocs an nagdugang sa naghehewas na hanay kan mga nagsusurporta ki Dy, kaibahan an Northern Luzon Alliance asin an 44 miyembro kan Party-list Coalition Foundation Inc., na kapwa nagpahayag nin tiwala sa saindang pamamayo asin sa pigbubusol kaining reporma tanganing maibwelta an tiwala kan publiko sa Kongreso.
