Mas pinakusog na kan National Capital Region Police Office (NCRPO) an pagbantay kan mga pulis sa mga lugar na parating dinadayo asin pigdadayuhan kan mga dayuhang turista sa Metro Manila.
An lakdang na ini bunga kan duwang suway na insidente nin krimen asin karahasan na dai pa sana nahahaloy an mga dayuhan an imbwelto sa mga syudad kan Parañaque asin Maynila.
Segun ki NCRPO Officer-in-Charge PBGen. Christopher Abrahano, katuyuhan kan pinakusog na seguridad na matawan nin kasiguraduhan an mga bisita kan nasyon na ligtas sinda sa saindang pagbiyahe.
Idinugang man ni Abrahano na marikas asin epektibo sindang maghiro kontra sa mga maraot na indibidwal o grupo na nagsasalingoy asin nagbibiktima sa mga turista.
Padagos man na nakatutok an mga awtoridad sa imbestigasyon kan mga nakaaging insidente mantang pinapakusog an police visibility sa mga mayor na pasyalan.
