Naglangkaw sa 2.54 million an numero kan mga Pilipinong mayong trabaho o negosyo kan nakalihis na Oktubre.
Katampad ini nin 5% na paglangkaw, boot sabihon nasa 50 gikan sa 1,000 indibidwal an mayong trabaho o negosyo sa nasambitan ng peryodo.
Mas halangkaw an nairehistrong unemployed kan Okubre kumparar sa 1.97 million na nairehistro na unemployed individuals kan Oktubre kan nakalihis na taon.
Sa press briefing ngunyan na aldaw, Disyembre 10 sa Labor Force Survey kan Oktubre, pigpaliwanag ni Philippine Statistics Aurhority (PSA) USec. asin National Statistician Claire Dennis Mapa na an paglangkaw kan unemployed individuals sa nasyon kan nakalihis na bulan an huli sa dae pagkaka-absorve sa trabaho kan ibang nag-participate sa labor market.
Sa year-on-year, sigun sa PSA chief, nadugangan nin 576,000 an numero kan mga mayong trabaho o negosyo, mantang nasa 463,000 man an nadugang na nagkaigwa nin trabaho.
Pigpaliwanag pa kan PSA chief na bahagyang nakaapektar an nagtamang bagyo kan Oktubre sa pagsipa kan numero nin mga mayong trabaho.
Alagad nahilingan nin paglangkaw an employment sa sektor kan agrikultura kan Oktubre kumparar kan Hulyo kun saen piglamasa kan makukusog na bagyo an nasyon.
Sa agricultural asin forestry, nagsakat sa 1.87 mllion an nagkaigwa nin trabaho base sa quarter-on-quarter kun saen pinakadakula na nag-ambag digde an pagtatanom nin paroy huli ta an peak season kan rice farming an sa huring kwarter kan taon.
Nagsunod man an pagtatanom nin mais asin hog farming.
