Ibinida kan Malacañang an mga lakdang kan administrasyon ni Presidente Ferdinand Marcos Jr. laban sa korupsyon, orog na katakor kan mga maanomalyang flood control projects.
Sigun sa Presidential Communications Office (PCO), personal na pinangenutan kan Presidente an pagbuyagyag asin pagsisiyasat sa mga proyektong may iregularidad.
Nagkapira sa mga ini an nadiskubreng substandard, mantang an iba an dae na man talaga mag iiral. Pigtawan duon kan Palasyo na si Presidente Marcos an primerong lider na hayagang naglantad kan katiwalian sa mga pagawaing bayan.
Kaiba man sa mga lakdang kan gobyerno an paglulunsar nin “Sumbong sa Pangulo” website, pagbilog nin Independent Commission for Infrastructure (ICI), asin an Transparency Portal ng Department of Public Works and Highways (DPWH) tangani pakusugon an pagbabantay asin paninimbagan sa mga proyekto kan gobyerno.
Dugang kan Malacañang, padikit dikit nang nababawi an mga pondong hinabon asin liwat na pigtagama an flood control budget sa mas mga importanteng programa. Pigsierto man kan Palasyo na mapadagos an paghahabol sa mga sangkot hasta sa sinda an manimbag sa ley
