Aprubado na an dagdag-sahod na P39 sa aldawang minimum wage kan mga obrero sa pribadong sektor sa Northern Mindanao, na nilalaomang ipapautob sa katahawan kan Enero, sigun sa Department of Labor and Employment (DOLE).
Inihayag kan DOLE na pinagtibay kan National Wages and Productivity Commission (NWPC) an Wage Order No. RX-24 sa saindang meeting kan nakalihis na Disyembre 22.
Sakop kan wage order an parehong non-agriculture asin man agriculture sectors, kun saen inilangkaw sa P485 an aldawang minimum wage para sa Wage Category I asin P500 man para sa Wage Category II.
Ipapautob an umento sa duwang yugto: P25 magpuon Enero 16 asin man dugang na P14 sa Mayo 1. Kaiba sa Wage Category I an mga syudad kan Cagayan de Oro, Iligan, Malaybalay, Valencia, Gingoog, El Salvador asin Ozamiz, pati man an mga banawaan kan Tagoloan, Villanueva, Jasaan, Opol, Maramag, Quezon, Manolo Fortich asin Lugait.
Sakop man kan Wage Category II an gabos kan iba pang lugar na dae kabali sa Category I, pati an mga retail asin man service establishments na may dae malabi sa 10 obrero.
Pinagtibay man kan NWPC an Wage Order No. RBX-DW-06 na nagtatao nin P500 dagdag-bulanang sahod sa mga kasambahay sa bilog na rehiyon, rason tangani na magpakol sa P6,500 anminimum na bulanang sahod kan mga domestic workers. An parehong wage orders an inilathala kan nakalihis na Disyembre 31 asin magigin epektibo sa Enero 16
