Aram baya nindo mga kabombo, pagmate soboot kan sarong mister na garu pinapabayaan ini kan saiyang misis huli ta habo kaining mag-donate kan parte kan saiyang stay dawa pa buhay na kan saiyang mister an nakataya.
Ini an nangyari sa mag-agom sa South Korea, kun saen napuli sa masalimuot na pagsuhayan asin demandahan an saindang pag ibahan makalihis an garu sarong “malicious abandonment” kan misis sa mister.
An mister an na-diagnose kan primary biliary cirrhosis asin tinawan na sana nin sarong taon tangani mabuhay kun dae sumairarom sa transplant.
Dakulang kaogmahan kan pamilya kan madiskubreng 95 percent match an saiyang agom, alagad tulos ining naribayan nin anggot kan magsayuma an babae huli ta may “pathological fear” soboot ini sa karayom asin matatarom na bagay.
Hasta sa masuwerteng nakahanap nin brain-dead donor an lalaki asin matrayumpo na nakasalbar, alagad pagkatapos kan saiyang operasyon, iniimbestigaran kaini an palusot kan agom asin nadiskubreng nag uutik ini manungod sa saiyang phobia huli ta nakapagpaopera na ini kaidto kan appendicitis nin mayong isyu.
Kan komprontahon, umamin an misis na an tunay na rason kan paghabo kaini iyo an takot na magkaigwa nin kumplikasyon sa operasyon asin dagusang maulila sa ina an saindang duwang saradit na aki.
Sa ibong kan paliwanag, idinagos kan lalaki an kaso, alagad pumanig an korte sa babae. Pighurot kan judge na an organ donation an urulay kan “bodily autonomy” asin personal na desisyon, kaya dae ini pwedeng ikonsiderar na obligasyon dawa pa sa pag-ultanan kan mag-agom. Hasta sa nagkasundo na sana an duwa na mag-divorce.
Nakua kan babae an custody kan mga aki, alagad nagtugot ining magtao nin pinansiyal na suporta para sa padagos na pagpaparahay kan saiyang ex-husband.
