Duwang magsasaka an nagadan sa Salog nin Glamang, Barangay Anggas, Alabel, Sarangani Province, matapos magsagibo nin sarong ritwal na konektado sa iriwal sa daga
An mga biktima nag-eedad nin 69 asin 49 anyos, parehong residente kan Barangay Datal Anggas.
Base sa report, nagkasundo an duwa na magsagibo nin ritwal kan Oktubre 16 tanganing maresolbar an saindang iriwal manungod sa daga.
Segun sa inisyal na impormasyon, naghaloy an duwa sa irarom kan tubig nin labi sa 10 minutos, na nagresulta sa saindang pagkakalamos.
Tulos sindang idinalagan sa sarong ospital sa General Santos City, alagad parehong idineklara na dead on arrival.
Padagos na iniimbestigaran kan Alabel Municipal Police Station an insidente. Base sa inisyal na imbestigasyon, pareho daa nagtugot an mga biktima na sumairarom sa ritwal tanganing maresolbar an iriwal sa daga kan saindang mga pamilya.
Mantang, nananawagan an nagkapirang representante kan mga katutubo nin masusi na imbestigasyon sa insidente. Idinugang man ninda an kahalagahan kan pagrespeto sa kultura asin paghanap nin mas matuninong na paagi tanganing masolusyunan an mga iriwal.
