NAGA CITY- Liwat na pinagirumduman kan Public Safety Office Naga an mga driver kan trimobile na nagkakayod sa siyudad na mandatoryo an pagkua nin ID.
Sa nagin paghampang sa mga kagawad kan media ni Renne Gumba, an pamayo kan Public Safety Office Naga, sinaysay kaini na dapat an nasambitan ng ID an naka-display sa side car o sa laog kan trimobile asin nahihiling kan mga pasahero.
Obheto kan lakdang na ini na magin salbado an mga pasahero asin igwang malinaw na pagkakabistuhan kan driver.
Sigun pa ki Gumba, obligasyon kan mga driver na magparehistro enkaso makayod nin bangi asin dapat igwang prangkisa.
Siringman, pinagirumduman kan opisyal an mga driver na dae maglaog sa rutang ipinagbabawal huli ta igwang penalidad an siisay man na madadakop .
Dugang pa kan opisyal, antes man na ma-isyuhan kan nasambitan ng ID masairarom sa seminar an mga driver tanganing magin equipped sa kinakaipuhan na kaaraman pag-abot sa kasalbaduhan sa tinampo.
Mientrastanto, aga, hapon asin bangi man an operasyon kan mga personahe sa Public Safety Office Naga tanganing mamantinir an kasalbaduhan kan mga pasahero asin kan driver sa paagi kan Oplan Sita. Sa ngunyan, pig-enkaminar na sana ni Gumba an publiko na pirmeng i-check an ID kan driver na piglulunadan para sa seguridad.
