Posibleng maghurot si Independent Commission for Infrastructure (ICI) Special Adviser Rodolfo Azurin Jr. ki ICI Chairman retired Supreme Court Justice Andres Reyes nin immunity o garantiya na dae sinda babalikan kan mga personalidad na presente o posibleng makasuhan katakod kan nagpapadagos na imbestigasyon sa flood control anomaly.
Sigun ki Azurin, mawot nindang masierto na igwang bastanteng proteksyon an mga natatadang opisyal asin miyembro kan komisyon, orog na ta on-going pa an imbestigasyon kan ICI.
Dugang pa kan opisyal, kun magpapadagos an trabaho kan komisyon, irerekomendar kaini an pagbubugtak nin mga personahe sa manlaen-laen na ahensya kan gobierno tanganing magtabang sa imbestigasyon kan mga maanomalyang proyekto.
Kabali sa mga ahensiyang posibleng makipagtabangan an Philippine National Police (PNP), National Bureau of Investigation (NBI), Department of Trade and Industry (DTI), Anti-Money Laundering Council (AMLC), asin Bureau of Customs (BOC).
Mientrastanto, pigtawan duon man kan komisyon an importansiya na matawan an ICI nin kapangyarihang mag-isyu nin subpoena asin magpa-contempt kontra sa mga imbwelto sa flood control scam.
