Sinaysay kan Malakanyang na dae pinag-uulayan kun riribayan sa pwesto si Tourism Secretary Christina Garcia Frasco sa tahaw kan pambabatikos sa saiya.
Si Frasco an inakusaran na ginamit an government-funded tourism programs para sa soboot “self-promotion”.
Hinapot kasa si Presidential Communication Office (PCO) Undersecretary asin Palace Press Officer Claire Castro kum si Philippine Sports Commission (PSC) Chairman Patrick Gregorio an iriribay ninda Presidente Ferdinand Marcos Jr ki Frasco komo pamayo kan Department of Tourism.
Naenot nang sinaysay ni Castro na mayong rigodon na magaganap sa Gabinete ni Presidente Marcos Jr.
Napabareta na tinuyaw ni Senator Raffy Tulfo kan nakalihis na aldaw nin Martes si Frasco sa soboot pagpapahiling man sadiri imbes na mga destinasyon sa nagkapirang promotional materials kan turismo.
Sa pagdangog kan Senate Committee on Tourism, ipinahiling ni Tulfo an mga slides kan magazine asin iba pang materyales kun saen tampok an ladawan ni Frasco.
Tinukoy kaini an sarong magazine sa Japan komo “missed opportunity” tanganing i-promote an Philippine tourism, huli ta imbes na destinasyon, si Frasco an nahiling na tampok sa materyal maski sa groundbreaking ceremonies.
Sigun ki Tulfo, nakaresebir ini nin reklamo na garo piggamit ni Frasco an tourism materials para sa self-promotion.
Pigtawan-duon kaini na dapat nakatuon an DOT sa pagpapahiling kan mga destinasyon, pagkakan, wellness, asin kulturang Pilipino kaysa sa personalidad.
Sa saiyang simbag, sinaysay ni Frasco na mayo ining pagtugot sa paggamit kan saiyang ladawan sa magazine asin mayong pondo kan gobyerno an ginamit.
Nilinaw ni Tulfo na dwe kaini sinasabing madalagan si Frasco sa eleksiyon, kundi ipinapahayag sana na nanunutaran kan publiko an soboot self-promotion, na dae man nahihiling sa mga promotional materials kan turismo sa ibang nasyon, siring kan Vietnam, Korea, Malaysia asin Japan.
