Papahewason kan Department of Agriculture (DA) an programang “Benteng Bigas, Meron Na” sa Metro Manila tanganing mas kadakol na mga nagtitios asin bulnerableng sektor an makinabang sa P20 kada kilo kan bagas.
Sigun ki Agriculture Secretary Francisco Tiu Laurel Jr., target man ahensiya na magpatindog nin dae mababa sa limang P20 rice outlets sa lambang lokal na gobyerno sa Natinal Capital Region.
Obheto kaining maibalyo an abot-kayang bagas sa mga mamamayan asin mabawasan an gastuson kan mga pamilya.
Sinaysay man ni DA-Agribusiness and Marketing Assistance Service Director Junibert de Sagun na target an full-scale expansion kan programa antes matapos an Marso 2026 tanganing magtugma sa panahon kan aniyan asin masierto an bastanteng suplay.
Prayoridad sa programa an senior citizens, solo parents, persons with disabilities, 4Ps beneficiaries, minimum wage earners, miyembro kan TODA, paraoma, parasira, asin iba pang kwalipikadong grupo.
Nakipag-ulay na man an DA sa MMDA asin mga lokal na gobyerno sa Metro Manila tanganing parekason an implementasyon, mantang nagpromesa an MMDA nin suporta sa logistics asin monitoring kan programa.
