Preparado an Naga City Police Station 4 na magmantenir kan seguridad asin kaayusan sa selebrasyon kan Flores de Oktober sa Barangay Pacol, Ciudad nin Naga, sa maabot na Oktubre 26 asin 27.
Sa intrevista kan Bombo Radyo Naga PCAPT Arnel Azaña – Station Commander Police Station 4, sinabi kaini na na nagkaigwa sinda nin duwang coordinating meeting sa mga opisyales kan barangay asin sa Sangguniang Kabataan tangarig na maplano an preparasyon para sa nasabing selebrasyon.
Nagkaigwa na nin walkthrough sa lugar kun saen pamamahalaan an aktibidad, kaibahan an iba pang nanonongdan na ahensya, tanganing maseguro an tamang implementasyon kan mga safety measures durante kan festival.
Segun ki Azaña, supisyenteng bilang nin mga pulis an ikakaag sa lugar ngani na mamantenir an paz y orden, urog na sa presensya kan dakul na mga residente asin bisita.
Padagos na ipapaotob kan kapulisan an mga probisyon kan Safer City Ordinance kan lokal na gobierno kan Ciudad nin Naga, partikularmente an pagbabawal sa pag-inom nin arak sa mga pampublikong lugar asin pagsigarilyo, kaiba an iba pang mga bayolasyon, dawa sa mga espesyal na okasyon.
Mientrastanto, nagpagirumdom man si Asanya sa mga residente asin bisita na gamiton an mga designadong parking area para sa mga motorsiklo asin iba pang behikulo tangarig na mamantinir an marahay na dalagan kan trapiko. Igwa man nin itinalaan na lugar para sa pag-istambay asin pag-iribahan kan mga tawo sa selebrasyon.
Nangapudan man an kapulisan sa publiko na makipagtabangan sa mga otoridad asin magsunod sa mga panundon tangarig na maseguro an ligtas, matuninong, asin organisadong selebrasyon kan Flores de Oktober sa Barangay Pacol, Ciudad nin Naga.
