NAGAPUDAN si Senator Rodante MArcoleta na ipundo na an suboot “distortion” sa kasaysayan katakod kan pag-angkin kan Pilipinas sa Kalayaan Island Group sa West Philippine Sea.
Ini an makalihis siya tuyawon huli sa naenot niyang pahayag na garu nagbubusol na isuko an KIG na parte kan Spratly Islands. Sa pagdangog kan Senate Committee on National Defense and Security , Peace, Unification and Reconciliation, kinuwestyon ni Marcoleta an pahayag ni Senate Pro- Tempore Panfilo “Ping” Lacson kan Pevrero 4 na si Tomas Cloma an nakadiskubre sa Spratly sa iraron kan prinsipyong res nullius o pag-sadiri kan siisay man na enot na nakadiskubre asin sumakop sa sarong lupain na mayong nagsasadiri.
Sigon kay Lacson, itinao ni CLoma an Isla gikan sa Gobyerno na kalaunan ay isinapormal sa paagi kan Presidential Decree No. 1596 na pinirmahan ni dating Presidente Ferdinand Marcos Sr. na nagbilog sa munisiplidad kan Kalayaan kan taong 1978.
Alagad ipinagtaong- doon ni Marcoleta na sala an naratibong si CLoma an nakadiskubre sa Spratly kan taong 1956 kan ini man ideklara niya an apod na Freedomland.
Dugang pa kaini na kaibanan suboot an Pilipinas, Estados Unidos, United Kingdom, Austrilia, Japan asin China sa mga nagkontra sa deklarasyon ni Cloma huli sa suboot “undiscovered” o “unoccupied” an mga isla.
Pinagtaong-doon man kan senador na ang pagsadiri kan Pilipinas sa mga parteng tig-ookupa kaini an nakabase sa presensya kan mga Pilipino asin Kontrol kan Gobyerno, baku huli sa pagkakadiskubre o donasyon ni Cloma. Nagtutubod man si Marcoleta na dapat na pakarahayon an tigtutukdo sa mga eskwelahan para maibetaran an salang impormasyon sa mga estudyante.
Mientrastanto marikas man na pinabulaanan ni Lacson an pahayag ni Marcoleta asin sinabing tigbibisto mismo kan Lokal na gobyerno kan Kalayaan, Palawan an historikong record manungod sa “Independence Claim” ni Cloma kan Hulyo 6, 1956 kung sain itinatag an suway na gobyerno kan “Free Territory of Freedomland” na may kabisera sa Flat Island o Patag Island. Sigon kay Lacson, Isinuo ni Cloma an saiyang claim sa gobyerno kan dekada 1970 kasibay kan P1 na nagtataong dalan sa pagluwas kan PD 1596 asin opisyal na pagtatag kan munisipalidad kan Kalayaan.
Kung babalikan an orulay sa Spratlys an nagsakyada kasunod kan serye nin maiinit na palitan nina Mrcoleta asin Lacson manungod sa KIG na parte kan mga pinag-aagawang teritoryo sa kadagatan kan nasyon. Apwera man sa Pilipinas tig-aangkin man an nasyon kan Taiwan, Vietnam asin Brunie na nagkapirang parte kan Spratly Islands.
