Nagkundisir an sarong grupo nin monitoring sa merkado kontra sa mga naglalakop na Cosmetic Product na igwa nin nakakalason na kemikal na pwedeng makaapektar sa salud kan tawo asin sa kalikasan.
Sa entrevista kan Bombo Radyo Naga ki Thony Dizon, Ban Toxic Campaigner, sinaysay kaini na kabale sa saindang kampanya na maisulong an Safe Cosmetic Regulation asin matawan nin kaaraman an publiko dapit sa peligrong dara kan mga Cosmetic Product na nababakal sa murang kantidad na peligroso sa salud na igwa nin mga hazardous chemical.
Dugang pa kaini may mga produktong lipstick na nabakal sinda sa 8 syudad sa Metro Manila asin nanutaran na igwa nin caduim, led, mercury asin iba asin may mga lampas na limit sa paggamit base sa Asean Cosmetic Directives.
Pigtawan-duon man kaini na kaipuhan ini namatawan nin atensyon kan mga regulatory agency an mga Cosmetic Product lalo na an mga abot kaya na produkto sa merkado, huli ta an magigin target na mga vulnerable sector orog na sa kun ini an saindang magigin perming babakalon asin an exposure kaini sarong indikasyon na mas mailalaag sa peligro an salud kan mga naggaamit asin an kalikasan.
Sa ngunyan pangapudan kan opisyal na an mga regulatory agency na maibitaran na makalaog sa nasyon an mga produkto na igwa nin mga salak na nakakalason na kemikal, an Local Government Unit naman mas maigtingon an mga monitoring sa mga nasasakupan na merkado tangani na masierto na mayu nin mga nakakapuslit na Cosmetic Product na mga barato, sa mga konsumedores naman siertuhon na an mga produkto an naka rehistro sa Food and Drug Administrator, basahon na marhay an mga ingredients kan mga Cosmetic Product na binabakal.
