Sa ibong kan mga tensyon sa Gulf Region na piglalaoman na magpapalangkaw kan presyo kan lana, an Senate Committee on Foreign Relations Chairman na si Erwin Tulfo nag-aagyat kan pagsuspinde kan Value-Added Tax (VAT) asin Excise Taxes sa lana.
Kasunod ini kan pahayag ni Presidente Ferdinand Marcos Jr. na saiyang sertipikaron bilang “urgent” an sarong ley na matao saiya nin temporaryong awtoridad na mabawasan an excise taxes sa mga produktong petrolyo.
Pigtawan-duon man kaini na maserbing temporaryong relief an nasabing lakdang urog na sa mga minimum-wage earners. Segun saiya, kinakaipuhan na magkaigwa nin balancing act huli ta emergency ini, asin dapat na maseguro kaini na an karahayan kan mga ordinaryong Pilipino an prayoridad sa tahaw kan krisis.
Sa irarom kan Senate Bill 1935 ni Tulfo, an VAT sa benta nin lana sususpendiron kun an average na presyo kan Dubai Crude Oil base sa Mean of Platts Singapore (MOPS) umabot sa 80 USD kada bariles.
Kasabay kaini, pigproponer man na isuspendir an VAT sa mga oil imports kun an MOPS umabot o maglampas na sa nasabing kantidad. Kamawot man kan bill ni Tulfo na awtomatiko nang mapondo an pagkolekta kan excise taxes sa oil na sinisingil sa nasyon kun uminabot o maglampas na sa 80 USD an global price.
