Nagpatanid an embahada kan Estados Unidos sa Pilipinas sa mga namamanwaan kan Estados Unidos na mag-ingat sa mga posibleng protesta asin demonstrasyon sa tahaw kan nagpapadagos na kariribokan sa Middle East.
Sa sarong pahayag, inabisuhan kan Embahada kan Estados Unidos an gabos na mga Amerikanong nasyonal sa bilog na kinaban na magin mapagbantay, magdanay na alerto, asin magpraktis nin marhay na mga lakdang sa personal na seguridad.
Segun sa embahada, posibleng mangyari an mga demonstrasyon sa Pilipinas, pati na sa palibot kan Embahada kan Estados Unidos.
Pigpagirumdom man kan embahada na an pagpartisipar sa mga protesta kan mga foreign nationals posibleng ikonsiderar na pagbalgar sa immigration status.
Sa bagay na ini, inaabisuhan an mga American nationals na mag-ingat orog na kun nasa palibot kan darakulang pagtiripon, dawa an matoninong na mga rallyy o demonstrasyon na pwedeng magin bayolente na mayong patanid, asin magsunod sa mga instruksyon hale sa mga lokal na awtoridad.
Inenkaminar man kan embahada kan Estados Unidos an mga namamanwaan kan Amerika na mag-enrol sa Smart Traveler Enrollment Program tanganing makaresibe nin mga alerto asin mas madaling masubaybayan enkaso magkaigwa nin emerhensya.
