Nagbabala ang Iran na hindi nila papayagang makalabas ang kahit isang litro ng langis mula sa Gitnang Silangan hangga’t nagpapatuloy ang pag-atake ng Estados Unidos at Israel, habang sinabi ni US Pres. Donald Trump na mas palalakasin ng Amerika ang mga pag-atake kung haharangin ng Iran ang daloy ng langis sa rehiyon.
Ayon sa Iran’s Islamic Revolutionary Guards Corps, ipagpapatuloy nila ang pagbabawal sa paglabas ng langis mula sa rehiyon kung hindi titigil ang mga airstrike ng Estados Unidos at Israel laban sa Iran. Sinabi ng kanilang tagapagsalita na sila ang magtatakda kung kailan matatapos ang digmaan.
Bilang tugon, nagbabala si Trump na haharap ang Iran sa mas matinding pag-atake kung susubukan nitong pigilan ang pagdaan ng mga oil tanker sa Strait of Hormuz—isang mahalagang ruta kung saan dumadaan ang humigit-kumulang isang-ikalimang bahagi ng suplay ng langis sa buong mundo.
Nauna nang sinabi ni Trump na nagdulot na ng malaking pinsala ang mga pag-atake ng U.S. sa militar ng Iran at naniniwala siyang maaaring matapos ang labanan bago ang itinakdang apat na linggong timeframe, kahit hindi pa malinaw kung ano ang magiging sukatan ng “tagumpay.”
Samantala, sinabi ng Israel na layunin nitong pabagsakin ang pamahalaang klerikal ng Iran, habang ayon sa mga opisyal ng U.S., pangunahing target ng Washington ang missile capabilities at nuclear program ng Iran.
Ayon sa embahador ng Iran sa United Nations, hindi bababa sa 1,332 sibilyang Iranian ang nasawi at libo pa ang nasugatan mula nang magsimula ang malawakang air at missile strikes ng U.S. at Israel sa bansa noong huling bahagi ng Pebrero.
Dahil sa tumitinding tensyon, halos tumigil na rin ang pagdaan ng mga tanker sa Strait of Hormuz nang higit sa isang linggo, dahilan upang pansamantalang ihinto ng ilang oil producers ang produksyon habang napupuno ang mga imbakan ng langis.
Nagkaroon din ng malaking paggalaw sa pandaigdigang merkado ng langis at stocks matapos tumaas nang malaki ang presyo ng langis bago muling bumaba kasunod ng pahayag ni Trump na maaaring matapos agad ang digmaan at posibleng pagluwag sa ilang oil sanctions.
Sa Tehran, nagkaroon ng makapal na usok matapos tamaan ng pag-atake ang isang oil refinery, na ayon sa World Health Organization ay maaaring magdulot ng kontaminasyon sa pagkain, tubig, at hangin.
Patuloy pa ring tumitindi ang tensyon sa Gitnang Silangan habang nagpapalitan ng babala at pag-atake ang mga sangkot na bansa.
