Ibinaba kan Supreme Court (SC) an desisyon na bakong konstitusyonal an nasyunal na badyet para sa taon 2024 asin 2025, partikularmente an “unprogrammed appropriations” (UA) na pigladawan bilang “bagong pork barrel”.
An desisyon, na ipinaluwas kan Oktubre 7, nagtutukdo sa signipikanteng paglangkaw kan UA sa General Appropriations Act (GAA) kan 2024 nin P449.5 billion, asin an pagdugang sa Special Road Fund kan 2025 GAA nin P17.99 billion.
Segun sa Supreme Court, an UA nagigin “constitutionally infirm” kun kulang ini nin sapat na estandarte, na nagtatao sa Ehekutibo nin “unchecked spending authority” na nagpapaluya sa “fiscal discipline”.
Idineklara man na ilegal an SAGIP (Strengthening Assistance for Government Infrastructure and Social Programs) sa mga probisyon kan UA kan 2024 asin 2025 GAA, huli ta ini sarong “prohibited lump sum appropriation”.
Kaiba man sa mga idineklara na bakong konstitusyonal an P12.75-billion na paglangkaw sa Special Accounts in the General Fund (SAGF) kan nagkapirang ahensya sa 2025 GAA, asin an nagkapirang probisyon kan UA sa 2026 GAA.
Bilang resulta, permanenteng ipinagbabawal kan Korte Suprema an pag-implementar kan Special Provision 1(a) asin (b), Chapter XLIII kan 2026 GAA sa mga ahensya kan gobyerno.
Pinagiromdom man kan SC na an “unprogrammed funds” dapat sana i-release kun igwa nin sobrang kita na lampas sa target, asin dapat magin “transparent and accountable” an “bicameral conference committee” sa saindang mga proseso.
