Pinahigot kan Coast Guard Station Camarines Sur an seguridad sa paagi sa pag-deploy nin karagdagang personnel sa mga resort lalo na sa mga lugar na dinadagsa kan mga turista.
Sa intrevista kan Bombo Radyo Naga ki LTJG Eidderf Lloyd A Olea, Spokesperson, PCG Camarines Sur, sinabi kaini na , may mga augmented personnel na ipwinesto sa iba’t ibang resort, kaiba an mga Coast Guard Auxiliary asin reservists bilang dugang na pwersa sa pagbantay asin pagresponde sa ano man na emerhensiya. Komo preparasyon, nagsagawa sinda nin Recreational Safety Compliance Inspection (RSCI) sa mga resort. Sakop kan inspeksyon an pag-evaluate kun kumpleto an mga safety equipment tulad kan first aid kits asin kun pasado sinda sa mga pamantayan na itinakda para sa operasyon kan mga pasyalan.
Pigtawan-duon ni Olea na an mga preparasyon ini nakatutok lalo na sa na weekend, partikular sa Domingo, kun sain piglalaoman an pinakadakul na bilang kan mga makarigos asin nagbabakasyon.
Nagpaabot man nin panawagan an Coast Guard sa publiko na magin maingat sa panahon kan Semana Santa, lalo na sa pagdagsa kan mga tawo sa mga beach asin resort. Pinapaandaman man an mga magurang na pirming bantayan an saindang mga aki, tanganing malikayan an mga insidente nin pagkalumos o pagkawara. Padagos an koordinasyon kan Coast Guard kaiba an iba pang ahensya tanganing masigurado an seguridad asin kaligtasan kan gabos sa panahon kan Holy Week.
