Ginibo an makolor asin family-friendly na “Candyland” booth bilang parte kan Isarog Hot Air Balloon and Music Festival na ginibo puon Mayo 1 sagkod Mayo 3 sa syudad nin Naga. An lugar igwa nin manlaen-laen na aktibidad asin pasilidad na may katuyuhan na magpa-ogma sa mga kaakian asin mga gurang.
Sa intrevista kan Bombo Radyo Naga ki Shaune David Mayor, Emcee & Host-Kandy Land, Kless Baby Needs 4 Less, nagsabi na an Kandyland matampok nin manlaen-laen na food and concessionaire booths, game booths, claw machines, souvenir stalls, asin inflatables na pwedeng gamiton kan mga kaakian sa minimal na bayad. An enot na aldaw kan selebrasyon nagtampok nin programa asin mga aktibidad para sa mga kaakian na inatenderan kan lambang mga pamilya.
Sa ikaduwang aldaw, sarong “kiddie rave dance party” an piglalaoman na gigibohon sa alas 8 nin aga, na bukas sa mga kaakian asin saindang mga magurang. Susundan ini nin sarong aktibidad sa paggibo nin mga bouquet sa The People Flower booth, na an katuyuhan iyo na dagkahon an pag-iribahan kan pamilya sa paagi nin mga aktibidad na may pagmukna.
Mientrastanto, sa ikatolong aldaw, magkakaigwa nin sesyon nin yoga sa alas 6 nin aga para sa gabos na edad, kaiba an mga ma. Susundan ini nin aktibidad sa arte na may titulong “Create Beyond Walls” na pinangenotan kan Ching Arts Studio.
Ipinaliwanag man kan mga organisador na an ticket sa festival balido sana sa aldaw kan pagbakal, alagad nagtatao ini nin bilog na aldaw na access sa lugar. An mga bisita tatawan nin wristband na matugot sainda na makalaog giraray sa lugar sa anuman na oras sa laog kan aldaw, basta dai ini nahale o naraot.
Dawa ngani libre an paglaog sa lugar kan Candyland kun igwa na sinda nin tiket sa festival, igwa nin minimal na bayad para sa nagkapirang aktibidad arog kan paggamit nin mga inflatable asin pagpartisipar sa nagkapirang kawat, siring man an pagbakal nin mga sobenir.
Sa kabilogan, piglalaoman na maserbing sentro nin kaogmahan asin pagtiripon kan pamilya an Kandyland sa laog kan tolong aldaw na selebrasyon.
