Ipinagsugo sa irarom kan Executive Order No. 127, ni Presidente Ferdinand Marcos Jr. an pagtogdok nin sarong nasyonal na polisiya para sa carbon market.
Katuyohan kaini na tawan nin oportunidad na makakua nin kita an mga proyekto na nakakatabang sa pagprotehir kan kapalibotan asin pagbawas kan polusyon.
Sa sistemang ini, pwedeng kumita an mga paraoma, komunidad, asin negosyo sa paagi kan pagtanom asin pag-ataman nin mga kahoy, paggamit nin malinig na enerhiya, asin iba pang gibo na nakakabawas sa greenhouse gases.
Makakaresibe sinda nin carbon credits na pwedeng ipabakal sa mga kumpanya na kaipuhan na otobon an saindang mga pangako para sa kapalibotan.
Segun ki Executive Secretary Ralph Recto, an Presidente nagmamawot na bako sana maprotehiran an kapalibotan kundi magkaigwa man nin dugang na kita, trabaho, asin oportunidad sa kabuhayan an mga Pilipino, orog na sa mga komunidad sa rural na lugar.
Minsan siring, kaipuhan na sumunod an mga proyekto sa mga pamantayan kan gobyerno asin mag-agi sa beripikasyon bago maging kuwalipikado para sa carbon credits.
An Department of Environment and Natural Resources (DENR) an matogdok kan mga polisiya asin matugdas kan Philippine National Carbon Registry tanganing masubaybayan an mga carbon credit asin malikayan an pandaraya o dobleng pagbilang.
Pangengenotan kan Climate Change Commission an komite na mangangasiwa sa pagpapatupad kan polisiya, mantang an Department of Finance an magsisirbing pangaduwang tagapangulo.
Pwede man gamiton an kikitain hale sa carbon credits tanganing pondohan an mga proyekto na maprotehir sa mga komunidad laban sa epekto kan climate change, arog kan matitibay na imprastraktura asin pasilidad nin tubig.
Idinugang ni Recto na bako ining bagong buwis sa carbon an ipinapataw kan kautusan.
Imbes, inilalatag kaini an pundasyon para sa sarong reguladong saodan kan carbon credits.
Igwa an DENR nin 30 aldaw poon sa bisa kan kautusan tanganing isumite an panukalang balangkas sa komite, na magkakaigwa man nin 30 aldaw tanganing aprobahan ini.
