Inasegurar kan Department of Agriculture (DA) Sec. Francisco Tiu Laurel Jr., an tulos na pagresponde sa naglalangkaw na food inflation na nag-abot sa 6.1%.
Kun babalikan an nakaaging report kan Philippine Statistics Authority (PSA), minalataw na an food inflation nag-accelerate sa 6.1% kan Abril, na nahihiling na apektado kan paglangkaw kan presyo kan paroy, mais, sira, asin gulay.
Ipinaliwanag kan sekretaryo na dawa ngani igwa nin bastanteng suplay nin kakanon an nasyon, an halangkaw na presyo kan mga produktong petrolyo an nagtulod kan mga gastos sa transportasyon asin logistic, na nakaapektar sa presyo kan mga barakalon.
Huli kaini, binuhay kan DA an mga food lanes kun saen hinale na an toll fees kan mga agri truckers asin binawasan man an port charges.
Pinapahiwas man kan hepe kan DA an pagmonitor kan merkado nganing maibitaran an sobrang paglangkaw kan presyo, mientras na padagos an pagtulod kan mga programa arog kan Benteng Bigas asin Rice-for-All para sa mas abot-kayang bagas.
Preparado man an gobyerno kan PH na mag-implementar nin price cap na P50 kada kilo sa mga imported rice enkaso magpadagos an paglangkaw kan presyo.
Segun sa sekretaryo, ginigibo kan DA an gabos tanganing mabawasan asin mapaluway an food inflation, mantang tinatabangan an mga paraoma na madugangan an saindang produksyon nin paroy, mais, high value crops, asin iba pang agri products.
