Pigtuyaw kan grupong Bantay Bigas an “flexible pricing scheme” kan National Food Authority (NFA), na nakikipagdiskutiran na an propuestong presyo nin pagbakal na ₱21 kada kilo nin basang bagas kulang tanganing masimbagan an padagos na nagdadakulang gastos sa produksyon.
Sa intrevista kan Bombo Radyo Naga kay Cathy Estavillo, Bantay Bigas, Spokesperson, sinabi kaini na nagtitinir na lugi an mga paraoma huli sa halangkaw na presyo kan mga abono, lana, asin iba pang basic farming necessities.
Nangapudan an Bantay Bigas sa gobyerno na direktang magbakal nin paroy sa mga paraoma sa presyong dai mababa sa ₱25 cada kilo. Makakatabang suboot ini na maibitaran an pag-aprobetsar kan mga pribadong negosyante asin masiguro na an mga lokal na paraoma makakaresibe nin patas na bayad. Pig-asegurar man kan grupo na an presenteng sistema sa irarom kan Rice Tariffication Law o Republic Act No. 11203 iyo an nagpagrabe sa pagdepende kan nasyon sa imported na bagas asin nagwalat sa mga paraoma sa precarious na kamugtakan.
Ipinahayag man kan grupo an padagos na mga problemang inaatubang kan sektor nin agrikultura, kabali na an labing ₱3 bilyon na danyos na dara kan El Niño asin an paglaog kan pigkakarkulong 2.7 milyones na metriko tonelada nin imported na bagas sa enot na kabanga sana kan taon. Huli kaini, nanindugan an Bantay Bigas na magtao nin ₱50,000 na subsidiya sa produksyon sa lambang apektadong paraoma tanganing matabangan sindang makabangon asin maipadagos an saindang produksyon.
Apwera sa isyu kan presyo kan paroy, nangapudan man an grupo para sa mas mahiwas na reporma sa sektor kan agrikultura. Kabali sa saindang mga propuesto iyo an pagtogdok nin mga post-harvest facilities arog kan cold storage asin mechanical dryers, an pag-implementar nin tunay na reporma sa daga, asin an pag-scrap kan mga polisiya na nagtutugot daa nin land grab asin long-term lease kan mga dayuhan sa kadagaan kan nasyon.
Pig-enkaminar ni Bantay Bigas an publiko na magin kritikal asin makikooperar sa pagtulod kan mga reporma na makakapakusog kan lokal na produksyon nin pagkakan. Pigduon kan grupo na kinakaipuhan an marikas na aksyon kan gobyerno tanganing maprotehiran an karahayan kan mga paraoma, mapakusog an food security, asin mabawasan an pagsarig kan nasyon sa imported rice.
