Kinuwestyon ni Senator-Judge Raffy Tulfo an sinasabing dai pantay na pagpatuman kan duwang minutong limitasyon sa pagtataram durante kan Impeachment Trial ni Vice President Sara Duterte nitong Miyerkules, Hulyo 22.
Nag-abot an isyu kan nagtataram si Senator-Judge Robin Padilla sa House Prosecution Panel. Digdi nagpahayag nin pagkadismaya si Tulfo asin sinabi na bako man pareho an oras na naaatubang sa mga Senator-Judge, na may iba umanong nakakataram nin mas halawig bago putulon an oras.
Segun kay Tulfo, sa iya mismo, pasiring pa sana sa pagpadagos kan pagtataram, naghihuni na tulos an warning bell, habang an ibang Senator-Judge kuno nakakaaram nin lima sagkod sampulong minuto bago matapos an oras.
Nagpaliwanag man si Senate Impeachment Court Presiding Officer Francis “Chiz” Escudero na mayo nin majority o minority sa Impeachment Court, asin pare-pareho an papel kan gabos na miyembro bilang Senator-Judges.
Sabi ni Escudero, may mga pagkakataon na pinapadagos niya an pagtataram nin sarong senador tanganing matapos an linya nin pagtataram o pangutana, pareho kan dating paghatag nin dugang na oras ki Senator Panfilo “Ping” Lacson.
Pero iginiit ni Tulfo na dapat pareho an pagpatuman kan itinakdang oras tanganing masiguro an patas na pagkakataon kan gabos na senador na makapagtukdo nin mga pangutana.
Bilang tugon, ipinagbuot ni Escudero sa clerk of court na paalalahanan an opisyal na nagmamanihon kan warning bell tanganing masiguro an pare-parehong pagpatuman kan time limit.
Sinuportahan man ni Senator-Judge Alan Peter Cayetano an obserbasyon ni Tulfo, pero sinabi niya na naranasan man niya na maputulan nin oras habang nagtataram sa pagdinig.
Iminungkahi ni Cayetano na imbes na istriktong putulon an duwang minutong limitasyon, mas marhay na pahumanon muna an senador sa iyang pangutana tanganing maging mas maayos an dalagan kan paglilitis.
Samantala, ipinagtanggol ni Padilla an kahalawig kan iya pagtataram. Sabi niya, mga pangutana sana an iya inihahapot na puwedeng sabihon nin “iyo” o “dai,” asin an halawig na mga kasimbagan kan Prosecution Panel an nagkakakan sa kadakol na oras sa pagdinig.
