Nagpatanid kan nakalihis na Huwebes an Malacañang sa mga Local Government Units (LGU) na magin mapagmatyag laban sa mga Scam asin Disinformation na may kinaraman sa Local Government Support Fund (LGSF) asin Socio-Civic Projects Fund (SCPF).
Sa sarong press briefing sa Malacañang, sinabi ni Presidential Communications Office (PCO) Undersecretary asin Palace Press Officer Claire Castro na dae nagsisingil an Office of the President nin ano man na bayad o fees sa mga benepisyaryong LGU tanganing makua an saindang inilaan na pondo.
An LGSF sa irarom kan Support and Capital Projects Fund (SCPF) iyo an ayuda pinansyal hale sa nasyonal na gobyerno na itinatao sa mga lokal na komunidad asin barangay. Kabali digdi an tig-₱200,000 na alokasyon para sa lambang siyudad asin munisipalidad sa irarom kan programang Bawat Bayan Makikinabang, na pinagbabaranga para sa mga proyektong pangkauswagan, pangkaligtasan kan barangay, asin scholarship kan mga estudyante.
Pig-enkaminar ni Castro an mga opisyal kan LGU na mag-ingat sa mga indibidwal na naghahagad nin personal na impormasyon o nagsisingil karibay kan pagpapaluwas kan saindang pondo. Tinawan doon ni Castro na mga awtorisadong kinatawan sana kan gobyerno an dapat nindang kaulayon.
Sinabi man ni Castro na an Office of the President na pwedeng gamiton kan mga scammer an makukuang impormasyon tanganing mailihis o maagaw an pondong nakalaan para sa mga LGU.
Pig-inkaminar man ni Castro an mga opisyal kan LGU asin an publiko na dai na mag-atubiling ireport sa Office of the President an ano man na kahina-hinalang aktibidad o mapanlinlang na gawain tanganing tulos ining maaksyunan asin maprotektaran an mga benepisyaryo.
