Pinahimutikan ni dating House Speaker asin Leyte Representative Martin Romualdez an paratang kan Ombudsman na in suboot an nasa likod kan pagbawi kan mga Affidavit kan nagkapirang dating bodyguard ni dating Ako Bicol Party-list Representative Zaldy Co.
Sa sarong pahayag, sinabi ni Romualdez na mayong katotohanan asin tinawan-doon na ipinapahiling sana kaini an panggigipit suboot laban sa saiya.
Segun pa digdi, an pagbawi kan mga “maleta boys” sa saindang mga salaysay iyo man an patotoo na sala asin gibo-gibo sana an mga paratang na ikinokonektar sa saiya manungod sa suboot Flood Control Anomalies.
Dugang pa kan Kongresista, preparado ini na atubangon an gabos na alegasyon asin patunayan an saiyang pagka-inosente.
Mientrastanto, sinabi man ni Ombudsman Jesus Crispin Remulla na posibleng maatubang sa kaso an Apat nba dating bodyguard na nag-atras sa saindang na enot na mga testimonya.
Segun digdi, dae pabor an mga Korte sa mga pagbawi nin Affidavit, lalo na kun duwang beses nang nagtao nin magkaibang salaysay an mga testigo.
Sinabi man ni Remulla na posible man na maibali komo mga akusado an mga dating Security Personnel kun dae na sinda masirbing mga testigo sa padagos na imbestigasyon.
Padagos man na iniimbestigaran kan Office of the Ombudsman an mga reklamong plunder, graft, asin direct bribery na isinangat laban kay Romualdez manungod sa suboot pagtanggap nin kwarta na hale sa Flood Control Scandal.
