Maabot sa limang katawo an naisalbar makalihis an landslide sa Guidag-Surong, Baguio City kaining Dominggo nin banggi, Agosto 9, kasunod kan dagos-dagos na makusog na pag-uran.
Segun sa Baguio City Public Information Office, nangyari an landslide bandang ala-7 nin banggi asin tumama sa tulong harong na tig iistaran nin limang pamilya.
Segun sa impormasyon hali sa Baguio City Police Office, pito pang katawo an padagos na pinaghahanap makalihis ma antugan kan daga an mga harong.
Segun sa mga awtoridad, pitong katawo an nakaistar sa inot na harong, duwa sa ikaduwa, asin tulo man sa ikatulong harong.
Paglaog nin alas-8:59 nin banggi, apat na katawo na an kumpirmadong naisalbar—duwang babae, kabali an sarong aki, asin duwang gurang na lalaki.
Tulos sindang dinalagan sa ospital tanganing sa kinakaipuhan na medical treatment.
Paglaog man kan alas-9:40 nin banggi, nairehistro na lima na an naisalbar.
Segun sa Baguio City Mayor Benjamin Magalong, ipinadara na sa lugar an mga tawohan kan City Disaster Risk Reduction and Management Office, Baguio City Fire Station, Baguio City Police Office, asin mga barangay first responder tanganing ipagpadagos an search and rescue operations.
