Nanindugan an mambabatas na si House Committee on Appropriations Chairperson Rep. Mikaela Suansing na “transparent” an ginibong deliberasyon manungod sa pondo nasyonal para ngonian na taon. Hinagad man na aprobaran an gabos na propwestong mga pag-amyendar sa institusyon sa pondo.
Segun ki Suansing na an nasyonal na pondo para sa 2026 mayo nin mga insersyon o pork barrel komo an propwestong pondo para sa masunod na taon.
Manungod sa propwestong pondo para sa 2027, paliwanag ni Rep. Suansing na an pagbilog kan NEP yaon sana sa hurisdiksyon kan ehekutibo.
Apwera pa kaini, mahigot kaini na pinahimutikan an alegasyon na igwang manlaen-laen na pork barrels o insertions sa proponidong pondo nin huli ta sa puntong ini, dae pa man naghagad asin narerepaso an kongreso kan kontribusyon kan NEP.
Ginibo kan mambabatas an paglinaw makalihis na isumitir kan Department of Budget and Management (DBM) sa Kamara kan Agosto 11 an propwestong P7.2 trillion National Expenditure Program (NEP) o budget proposal kan administrasyon ni Marcos para sa fiscal year 2027.
An alegasyon kan miyembro kan House Justice Committee na si Rep. Terry Ridon nin mga insertions sa proponidong 2027 national budget mantang dae pa natapos an deliberasyon kan committee asin dae pa ini hinahagad kan mga Congressman asin Senador.
Ipigbuyagyag man sa sarong entrevista ni Baguio City Mayor Benjamin Magalong na an nagkapirang mambabatas na sinasabing nakikinabang sa budget insertions iyo an miyembros kan House prosecution panel na imbwelto sa impeachment trial laban ki Bise Presidente Sara Duterte.
Apwera pa kaini, inagyat ni Ridon an alkalde na ngaranan an mga pigtutukoy kaini na imbwelto sa mga insertions sa pondo. Sa speech kaini, nanindugan si Ridon, na saro man sa mga piskal kan Kamara, na dae nanggad ini mag-uurong-sulong asin padagos ini na matutok sa saiyang trabaho.
