Ipigdulog kan abogado kan Piskalya sa Kamara na si Atty. Lorna Kapunan an reklamo sa Senate Impeachment Court na nag-aalegar na “Indianized” sinda kan depensa makalihis na dai initndihon an saindang message asin dai nagkaokay kan nakaaging Huwebes o Biyernes tanganing ikumparar an acknowledgement receipts katakod kan Misuse of Confidential Funds Charges sa kasong kontra ki Bise Presidente Sara Duterte.
Sa saiyang manifestation sa ika-14 na impeachment trial ngonian na Martes, Agosto 11, sinabi ni si Atty.Kapunan na nagpapahiling ini nin “bad faith” sa lado kan depensa.
Segun sa pribadong piskal, nagrason suboot an ibong na lado na kulang an mga ini nin abogado asin mayo nin supisyenteng panahon na magsunod sa orden ni Trial Presiding Officer Francis Escudero.
Narurumdoman man ni Kapunan na nagpadara nin mensahe an saindang lado sa depensa kan nakaaging Miyerkules na naghahapot kun nuarin pwedeng magtiripon an mag-ibong na lado para sa stipulasyon kan acknowledgement receipts na mga dokumento.
Alagad, segun ki Kapunan, dae sinda nakaresibe nin simbag sagkod na matapos an oras nin opisina kan Huwebes, imbes ipigrekomendar an pagorolay sa Agosto 14, na lampas na sa duwang petsa na ipigrekomendar kan Impeachment Court.
Nagrason man Defense counsel na si Atty. Kristine Ferrer na dai na kaipuhan na ikumparar an mga exhibit huli an pag-aprobar kan authenticity kan mga resibo nasa diskresyon kan korte.
Marurumdoman na kan nakaaging impeachment trial kan Miyerkules, pigsugo kan presiding officer na mag-orolay an mag-ibong na lado sa Huwebes, Agosto 6 o Viernes, Agosto 7 tanganing ikumparar an mga acknowledgement receipts, na tinanggihan kan depensa.
Nagkaigwa nin light moment sa diskusyon dapit sa bagay na ini kan an presiding officer nagklaro ki Atty. Kapunan na dae ini na Indian kundi ‘na- ghost’ huli sa mayo pa nin nangyaring orolay.
“Chair would just like to correct. Hindi ka, Atty. Lorna, in-Indian baka ghinost ka kasi hindi ka sinagot e pero hindi ka in-Indian wala kayong pinag-usapang date pa eh,” biro ni Escudero kay Atty. Kapunan.
An nangengenot na opisyal nagdesisyon na tawan an mag-ibong na lado kan mga Senator-Judges nin mga kopya kan minarkahan na mga ebidensiya durante kan pretrial tanganing sinda mismo an makapagkomparar kan mga Acknowledgement Receipts.
