Ipinangaki an quadruplets o apat na umboy kan sarong ina sa banwaan nin Buhi Camarines Sur.
Sigon sa ina kan apat na umboy na si Joan, labi duwang bulan sindang nagtiner sa ospital makalihis ining mangaki sa paagi kan cesarean section. Huli sa dugang na apat (4) na mga umboy, igwa na sindang pitong (7) mga aki sa pamilya na gabos babaye.
Sigon ki Joan, mayong regular na trabaho an saiyang mister alagad padagos sana an paglapigot tanganing mabuhay an saindang pamilya. Sa ibong kan mga hamon sa pagpadakula sa saindang mga aki kabali na an pag-abot sa saindang buhay kan quadruplets, labi an saindang pagpapasalamat asin an mga ini an saindang magiging inspirasyon tanganing mas maging matatag pa sa buhay.
Mientrastanto, personal na binisita ni 5th District Representative Congressman Migz Villafuerte an pamilya kan maipaabot sa saiya an bareta huli ta primerong beses na nagkaigwa nin sarong pambihirang pangyayari sa bilog na probinsya nin Camsur. Nagpaabot man nin tabang asin suporta an Congresista sa bagong yugto kan saindang buhay.
Sigon sa pag-aadal, kinukonsiderar na pambihira an pagpangaki nin quadruplets huli ta kinakarkulong nangyayari sana ini sa poco mas o menos saro sa kada kabangang milyon hasta 700,000 na pagbados sa bilog na kinaban.
