An Pantawid Pamilyang Pilipino Program o 4Ps, sarong conditional cash assistance kan gobyerno na pinunan kan taong 2007-2008.
Sa intrevista kan Bombo Radyo Naga ki Dr. Emmanuel Onsay, CPA/ Economist, prubadong epektibong programa an 4Ps alagad basado sa pag-aadal, igwa nin mga nagkapirang benepisyaryo na dai nakahawas sa pagtios huli sa maglain-laen na sitwasyon.
Sigon digdi, kadaklan sa mga benepisyaryo napapamaray man an buhay alagad an iba, nagtitios man giraray.
Sa ibong kan karahayan kan obheto kan programa na makahawas sa pagtios an mga benepisyaryo, igwa pa man giraray nin mga nagtitios huli sa salang paggamit kan cash grant.
An iba sa mga ini isinasangra an mga ATM asin an iba ginagastos sa sugal o sa saindang mga bisyo hasta sa nababaon na sa utang sa ibong kan marhay na katuyuhan kan 4Ps.
Dagdag pa ni Onsay, importanteng magkaigwa ni istriktong implementasyon an gobyerno huli ta inaapod ining conditional cash transfer na boot sabihon, bako ining one time assistance huli ta igwang kondisyon na kaipuhan sunudon an mga grantee.
Pagirumdom na sana ni Onsay na tawan importansya kan mga benepisyaryo an cash grant huli ta gikan ini sa kwarta kan mga tax payer.
