Pinag-iingat an mga residente sa 106 na barangay sa Cordillera Administrative Region (CAR) na natukoy na halangkaw an peligro sa landslides asin flash floods huli sa padagos na pag-uran dara kan Habagat.
Nagpatanid an Mines and Geosciences Bureau (MGB) Cordillera sa posibleng landslide asin pagbaha asin nangapudan sa mga lokal na gobyerno na magin preparado sa posibleng pag-ebakwar kan mga residente na namemeligro.
Sinugo ni MGB-Cordillera Regional Director Socrates Gaerlan an mga lokal na gobyerno asin Disaster Risk Reduction councils na mahigot na bantayan an mga lugar na nakakamati nin makusog na uran, orog na an mga komunidad na harani sa mga salog.
Segun sa tala kan MGB, an pinakadakol na high-risk areas iyo an sa Kalinga na uminabot sa 50, kabale an mga lugar sa Tabuk City, Pinukpuk asin Rizal, partikular na sa Barangay Liwan.
Igwa nin 24 na landslide-prone areas sa Benguet, kabali an Atok, Bokod, Itogon, La Trinidad, Tublay asin Baguio City.
Mientrastanto, igwa nin 22 na high-risk areas sa Ifugao, partikular na sa Aguinaldo asin Alfonso Lista; pito sa Mountain Province, sa Paracelis; asin tulo sa Apayao, sa Conner.
Piglalaoman na makapagtatala nin 50 hasta 200 milimiter nin uran sa nagkapirang parte kan Cordillera sa laog kan masunod na pitong aldaw.
