Piglinaw kan Camarines Sur Police Provincial Office (CSPPO) an post sa social media manungod sa suboot pagkagadan kan suspechado na imbuelto sa pananaksak kun saen grabe an lugad ni PSSg Noli M. Mirana, sarong personahes kan San Jose Municipal Police Station (MPS), na nagresulta sa pagkaputol kan saiyang walang kamot.
Makalihis na maaraman kan opisina an mahiwas na pagpalakop kan nasabing post, tulos ining nagdirehir sa San Jose MPS na i-verify an veracity kan impormasyon. Tulos man na nagkondusir nin beripikasyon an mga personahes kan San Jose MPS asin yaon ngonian sa Bicol Medical Center (BMC), kun sain nagbabantay sinda sa luwas kan kwarto kan suspek asin direktang pigbabantayan an kamugtakan kaini.
Susog sa mga tawohan kan BMC, an pagtao nin opisyal na Death Certificate, kun kaipuhan, nakadepende pa man giraray sa pagkumpleto kan mga pigreseta kan ospital na mga proseso medikal asin administratibo, na pwedeng umabot nin duwa sagkod tolong aldaw. Huli kaini, asin sa kawaran nin supisyenteng medical evidence asin tamang beripikadong opisyal na dokumento, dae pa makakapaluwas nin depinitibo o pinal na pahayag an CSPPO dapit sa soboot pagkagadan kan suspechado.
Sa rason na ini, nangangapudan an Camarines Sur PNP sa publiko na magin maingat asin kritikal sa pagpalakop nin impormasyon na dae beripikado. An ano man na pahayag manungod sa pagkagadan nin sarong indibidwal dapat na nakabasar sa supisyente, kredible asin opisyal na mapapatunayan na ebidensya, asin bako sana sa mga alegasyon, osipon o mga post sa social media.
Tinawan doon kan CSPPO na magdadanay ining komitido sa pag-uphold kan katotoohan, integridad kan ebidensya, due process of law, asin responsableng paghiras nin impormasyon sa publiko.
