Binisto an Canaman Leaders for Empowerment Organization (CYLEO) komo saro sa Ten Outstanding National Awardees kan 9th Villar Foundation Youth Poverty Reduction Challenge 2026.
Sa intrevista kan Bombo Radyo Naga ki Mathew-Jule Altamarino “Naoe”, founding president kan CYLEO, naghiras na an saindang organisasyon iyo sana an organisasyon kan mga jovenes hale sa bilog na Rehiyon Bikol na nakaresibe kan siring na nasyonal na pagbisto.
An CYLEO nabilog kan 2024 kasunod kan destroso kan bagyong Kristine sa Pilipinas. Sigon ki Naoe, ini na an ikaduwang national recognition na naresibe kan saindang organisasyon ngonian na taon, makalihis na midbidon man ini kan National Youth Commission kan nakaaging taon.
Obheto kan CYLEO na matabangan bako sana an mga jovenes kundi magin an bilog na komunidad, partikularmente an mga indibidwal asin pamilya na pinakanangangaipo nin suporta asin tabang.
Poon sa anom na orihinal na miyembro, an organisasyon nagdakula asin ngonyan igwa na nin labing 109 na miyembro, na an kadaklan mga boluntaryo gikan sa banwaan nin Canaman.
Sa ibong kan pagiging estudyante, si Naoe padagos na nagdudusay kan saiyang panahon sa pagserbi sa komunidad sa paagi nin tamang pagmanehar kan oras.
Idinagdag pa kaini na bako lang an mga tawong may posisyon o opisyal na trabaho an pwedeng ibilang na mga lider. Para ki Naoe, pwedeng magin lider an lambang indibidwal, igwa man nin posisyon o mayo, basta may kusog nin boot asin boot na maipahiling an sadiri nindang kakayahan asin magpartisipar bilang parte kan youth sector.
Padagos an pagtulod kan CYLEO kan saindang adbokasiya para mas mapakusog an partisipasyon kan mga jovenes asin matawan nin kongkretong tabang an mga nangangaipo sa komunidad.
