Pigsierto kan Naga City Police Station 3 an mahigot na seguridad sa palibot kan University of Nueva Caceres (UNC) sa Ciudad nin Naga bilang preparasyon sa tulong aldaw na 2026 Bar Examinations.
Sa intrevista kan Bombo Radyo Naga ki PLTCOL. Elmer R. Azurez Jr., Acting-Chief of Police, NCPO 3, an pagdeploy nin mga personahes mapoon sa amay na alas una nin aga sa enot na aldaw kan exam, Setyembre 6, tanganing maseguro an orden asin seguridad sa exam venue.
Pigkakarkulong 100 na PNP personnel an ipapadara sa mga mayor na agihan, sa perimeter kan examination area, asin iba pang mga lugar na nangangaipo nin presensya kan pulis.
An pag-deploy kan pulis magpapadagos man bago, sa laog, asin pagkatapos kan lambang aldaw kan eksaminasyon. Haros parehas man an bilang kan mga personahes na ipigdeploy sa enot na duwang aldaw, mantang piglalaoman na madugangan pa ini sa ikatolong aldaw kan exam sa Setyembre 13.
Segun ki Azures, posibleng haros magdoble an bilang kan mga personahes sa huring aldaw nin huli sa inaapod na “Bar Operations,” kun sain maduman an mga representante kan mga escuelahan na may examinees tanganing mag-ako asin mag-greet sa saindang mga bar examinees pagkatapos kan exam.
Mientrastanto, an mga awtorisadong examinees asin mga personang sakop kan itinalaan na guidelines sana an tutugutan na makalaog sa designadong examination area. Mahigpit na ipapautob kan mga awtoridad an mga guidelines na itinalaan para sa Bar Examinations.
An pag-deploy obheto na mamantenir an areglado, seguridad, asin sarong marahay na dalagan kan mga aktibidad sa bilog na panahon kan eksaminasyon.
