Mapreparar an mga otoridad nin pitong mayor na medical station bilang parte kan medical response plan para sa mga Traslacion tanganing maparikas an pagtao nin first aid sa mga nangangaipo.
Sa paghampang sa mga Kagawad kan Media ni Dr. Erlie Arvin Cabral, Task Force Medical Leader of Incident Management Team, sinabi kaini na n mga istasyon ibubugtak sa Peña Francia, Magsaysay Bridge, Central, Colgante, Crown, Himol Street, asin Cathedral. An lambang lokasyon magkakaigwa nin medical tent, mga doktor, asin mga ambulansya para sa tulos na pagresponde sa mga emerhensya.
Dai mababa sa tolong ambulansya kada istasyon an nakatalagang naka-standby. Uminabot na man sa 31 an total na bilang kan mga ambulansya na nakatagama para sa nasabing operasyon, gikan sa 23 kan nakaaging semana.
Magkakaigwa man nin mga team leaders sa pitong operational areas ngani na masiguro an magkakanigong koordinasyon asin organisadong deployment kan mga medical responders asin ambulansya.
Segun ki Cabral, katuyuhan kan sistema na maparikas an assessment asin transportasyon kan mga pasyente asin maibitaran an pagkaatraso sa pagdara sa mga ini sa ospital. Padagos pa an koordinasyon para sa mga dugang na medical responders bago an Traslacion.
