Inomaw kan publiko an kalinigan kan mga tinampo na inagihan kan Traslacion Procession makalihis tulos na malinig an mga basura sa paagi kan kooperasyon kan Solid Waste Management Personnel asin mga pribadong grupo, mga estudyante, asin mga boluntaryo.
An mga student leaders nakisumaro sa boluntaryong aksyon para makatabang sa pagmantenir kan kalinigan asin proteksyon kan kapalibutan sa Ciudad nin Naga.
Sa intrevista kan Bombo Radyo Naga ki Jeffrey Morie, Instructor, sinaysay kaini na ginibo ini sa paagi kan pagtatarabangan bilang parte kan saindang pakikisumaro sa pagprotehir kan kapalibutan. Sa ibong kan dae malilikayan na pagdakul kan basura huli sa pagdakol kan mga tawo, nagboluntaryo an mga student leaders na magtabang sa paglinig kan lugar.
Nagpoon an pagkolekta nin basura pakahale kan mga deboto asin luway-luway na nagbaba an bilang kan mga tawo sa lugar. Obheto kan mga volunteers na makatabang sa tulos na paglinig kan lugar asin magserbing ehemplo sa mga jovenes.
Naglalaom an mga student leaders na magiging inspirasyon an saindang simpleng akto nganing ma-engganyar an ibang jovenes na makisumaro sa mga aktibidad na makakatabang sa komunidad asin sa kapalibutan.
Nangapudan man sinda sa publiko na magin responsable sa pag-apon nin basura, orog na sa panahon nin pagdagsa kan mga tawo para sa Peñafrancia Festival. Sinabi ninda na sa paagi kan kolektibong aksyon asin disiplina, an lambang saro makakatabang na magin malinig an Naga asin magin maray asin matrayumpo an selebrasyon kan Peñafrancia.
