Gigibohon an solemneng Procesion de las Patronas Diocesanas del Bicol ngonian na Huwebes, Setyembre 17, 2026, alas 7 nin banggi, pakatapos kan Diamond Jubilee Mass sa Naga Metropolitan Cathedral.
Parte ini kan mga aktibidad sa pagromdom kan Diamond Jubilee kan Arkidiosesis kan Caceres, na may katuyuhan na magtiripon an mga deboto hale sa manlaen-laen na parte kan Bikol para sa sarong banggi nin pagpamibi, pagromdom kan mga biyaya nin Dios, asin pagpahayag nin debosyon sa Mahal na Ina, Nuestra Señora de Peñafrancia, asin sa mga patrona kan Bicolandia.
Mientras tanto, gigibohon man ngonian na aldaw an Inter-Diocesan Diamond Jubilee Celebration kan Archdiocese of Caceres sa Quadricentennial Arch, Naga Metropolitan Cathedral. An highlight kaini iyo an Diamond Jubilee Mass na gigibohon sa oras na alas 4 nin hapon bilang parte kan pagromdom kan 75 taon nin grasya asin misyon kan arkidiosesis poon 1951 sagkod 2026.
Papangenotan ini ni Most Rev. Charles John Brown, DD, Apostolic Nuncio to the Philippines, na pinangenotan kan Santa Misa bilang presider asin parahulit. Piglalaoman an mga bisita, peregrino, asin mga deboto hale sa manlaen-laen na parte kan Rehiyon Bikol na maatendir sa selebrasyon.
Iniimbitaran an gabos na makisumaro sa mga aktibidades komo pagpapahayag nin pasasalamat, pagtubod, asin pagkasararo kan Simbahan sa Bikol. Katuyohan man kan selebrasyon na tawan nin duon an padagos na pagdebosyon kan mga Bikolano sa Mahal na Ina asin sa mga patrona kan mga diosesis sa rehiyon.
