Padagos an preparasyon kan Commission on Elections (COMELEC) sa Pili, Camarines Sur para sa Barangay asin Sangguniang Kabataan Elections (BSKE) 2026, sa ibong kan posibilidad na ipagpaliban an pirilian na nakatalaan sa Nobyembre 2.
Sa intrevista kan Bombo Radyo Naga ki Atty. Fatima O. Gados-Pani-Agua – Election Officer IV, Comelec-Pili, sinabi kaini na ineenkaminar an publiko asin mga aspirante na magdanay na vigilante para sa mga iba pang anunsyo dapit sa desisyon sa eleksyon, orog na ngonian na pigkokonsiderar na crucial week para sa isyu kan posibleng pag-oktaba.
Sinabi man kan opisina na kun mayo nin opisyal na pagbabago sa schedule, magpapadagos an saindang preparasyon para sa pirilian.
Mientrastanto, inaabisuhan an mga nag-aandam na mag-file kan saindang Certificate of Candidacy o COC na ihanda an gabos na kinakaipuhan na dokumento asin dugang na rekisitos para maibitaran an anuman na problema sa saindang pag-file nin kandidatura.
Pigtawan-duon kan opisyal na mantang pighahalat an anuman na pinal na desisyon dapit sa eleksyon, an mga aspirante asin mga botante dapat na magdanay na andam sa anuman na mangyayari.
