Isasairarom sa sarong mayor na retrofit an Naga City Coliseum tanganing magin mas ligtas asin mas angay bilang primary evacuation center sa panahon nin kalamidad, na may planong gamiton giraray ini bilang lugar para sa mga mayor na isports asin iba pang pampublikong aktibidad.
Sa paghampang sa mga kagawad kan Media ni Leni Robredo, Naga City Mayor, sinabi kaini na pig-aayos an disenyo kan Coliseum makalihis na ini binaha kan magbagyong Kristine, kun saen temporaryong istaran duman an rinibong mga evacuees. Kabali sa mga mayor na problema iyo an tubig na naglalaog sa mga banyo asin an kondisyon kan mga bleachers, na dae man dinisenyo para sa long-term stay kan mga evacuees.
An mga propuestong pagbabago kabali an pag-adjust kan inclination kan mga bleachers, pagbugtak nin mga cistern asin mga lugar na pigkukuanan nin tubig, asin pagbalyo kan mga pasilidad arog kan mga banyo sa mas halangkaw na parte kan edipisyo. Itataas man an nagkapirang parte kan istruktura ngani na mabawasan an posibilidad kan pagbaha na makaabot sa mga importanteng pasilidad asin kagamitan.
An JSLA Architects man pigbabareta na nakipagtabangan sa paggibo kan disenyo para sa proyekto, mantang pig-aadalan an pagbugtak nin sarong komunal na kusina, mga relief packing asin mga lugar nin pagtipig tanganing an Coliseum magin mas andam sa panahon nin mga kalamidad. An Simbahan ni Jesukristo nin mga Banal sa Huring-aldaw pinagkokontak man para sa dagdag na suporta sa panahon nin mga kalamidad.
Mientrastanto, an pondo para sa proyekto, kaiba an gastos sa edipisyo asin mga kagamitan, itinagama. Kun matapos na an retrofitting, piglalaoman na maserbi ining mas marhay na evacuation center para sa mga residente hale sa mga flood prone areas, apwera pa sa pagiging venue para sa mga darakulang sporting events, concerts, asin iba pang aktibidad huli sa pigkakarkulong kapasidad kaini na 12,000 katawo.
