Naghuhurot an FETODA o tricycle operators asin drivers sa Ciudad nin Naga na dagdagan an pamasahe huli sa padagos na paglangkaw kan presyo kan gasolina.
Sa intrevista kan Bombo Radyo Naga ki Gil Belen – Fetoda President, sinabi kaini na haros pitong bulan nang dae nagbabago an pamasahe huli padagos an pag-incur kan mas halangkaw na gastos sa gasolina asin operasyon kan mga drayber.
Pigproponer kan grupo an paglangkaw nin dos hasta limang pesos kada pasahero tangani na makatabang sa saindang ingreso asin gastos.
Sinabi pa ni Belen na naiintindihan ninda an kamugtakan kan mga pasaherong hababa an kita, alagad nasasakitan man an mga drayber huli sa halangkaw na presyo kan gasolina.
Naglalaom an FETODA na marikas na masimbagan kan lokal na gobyerno an saindang kahagadan, kasabay kan pag-aako man kan epekto kan anuman na paglangkaw kan pamasahe sa mga commuters.
