Laoman kan mga miembros kunsumidores kan CASURECO II an hababang taripa sa kuryente ngunian na bulan nin Setyembre.
Sa intrevista kan Bombo Radyo Naga ki Engr. Rinner Bucay, Spokesperson- CASURECO II, kumpara kan nakalihis na bulan nin Agosto na nagpakol sa P13.3145 / kwh sa residencial laoman magiging poco mas o menos P10.00 na sana ini asin nasa P2-3.00/ kwh an ibaba sa taripa.
Sa low voltage an dating P12.4392 mabaa ini sa poco mas o menos P9.00 asin P2-3.00 an ibinaba kaini mantang an high voltage kan bulan ni Agosto nasa P10.9796 asin laoman an labi sa P8.00 na sana an taripa ngunian na bulan ni Setyembre.
Haros apat na bulan na naeksperienciahan kan mga consumer an halangkaw na taripa sa kuryente asin dakulang bagay an pagbaba kan presyo kaini ngunian na bulan.
Mientrastanto, piglinaw kan opisyal na dai sierto kun mantinido an hababang taripa hasta sa huring quarter kan taon huli ta padagos pang minomonitor kan Cooperatiba an an hiro kan presyo kaini.
Sigon digdi, posibleng makaapektar an padagos na pag-umento oksa presyo kan produktong petrolyo asin an paghiro kan piso kontra sa dolyar.
Pangapodan ni Bucay na pirming mag-andam asin magtipid sa kuryente huli ta enkaso liwat man na maglangkaw an presyo kan taripa, daing gayong mamamati kan mga consumer an epekto kaini.
