Pig-eenkaminar kan Bureau of the Treasury (BTr) an publiko, partikular an mga first-time investor, na mag-invest sa Retail Treasury Bond (RTB), bilang sarong ligtas asin accessible na oportunidad nin pag-iinvest sa gobyerno. Ini an sentro kan roadshow kan BTr kan Setyembre 30 sa Uma Hotel and Residences sa Naga City.
Sa intrevista kan Bombo Radyo Naga ki Hazel Calleja, Regional Office Director, BTR Region 5, ipinaliwanag kaini na an RTB bako sana para sa mga eksperyensyadong investor kundi para man sa mga enot na beses pa sanang mag-iinvest. Sa minimum na ₱5,000, pwedeng makilahok an mga Pilipinong 18 anyos pataas, basta may valid ID, TIN asin makumpleto an kinakailangang mga form.
Para sa RTB 32, an investment may 2.5 taon na term asin fixed interest rate na 6.875 porsyento. An proseso nin pag-invest pwedeng isagawa paagi sa website kan BTr asin sa participating mobile banking applications, kaya mas madali ini para sa mga gustong magsimula sa pag-iinvest.
An malilikom na pondo gikan sa RTB nagigin parte kan National Government Fund na ginagamit sa mga awtorisadong paggasto kan gobyerno, kabilang an mga programa sa healthcare, education asin social services.
Sinabi man ni Calleja na bako ini project-specific bond, kaya an pondo dai nakatalaga sa sarong partikular na proyekto.
Sa kabila kan fixed interest rate, igwa man nin dapat ikonsiderar an mga investor, partikular an liquidity, dahil 2.5 taon an term kan investment. Sa paagi kan roadshow, patuloy an pag-agda kan BTr sa publiko, lalo na sa mga kabataan asin first-time investor, na magtao nin atensyon sa pag-iinvest bilang parte kan paghahanda para sa saindang pinansyal na kinabukasan.
