Posibleng maglangkaw an konsumo nin kuryente sa mga masunod na bulan huli sa labi-labing init dara kan Super El Niño, segun sa Casureco 2.
Sa intrevista kan Bombo Radyo Naga kay Engr. Rinner Bucay, Spokesperson, CASURECO 2, sinabi kaini na posibleng dagdagan an konsumo kan mga consumidores nin kuryente, partikularmente sa panahon nin labi-labing init. Kun halangkaw an pangangaipo alagad limitado an suplay nin kuryente, ini pwedeng makaapektar sa presyo kan kuryente.
Bako lang konsumo sa laog kan Casureco 2 an posibleng maapektaran. Posible man na magkakaigwa nin epekto sa Luzon Grid, siring man sa Visayas asin Mindanao grids, depende sa kondisyon kan supply asin demand.
Paliwanag pa ni Bucay na an epekto kan paglangkaw kan presyo kan generation o iba pang singil na parte kan taripa kan distribution utilities posibleng maipasa man sa mga consumidores.
Mientrastanto, an posibilidad na magkaigwa nin power shedding enkaso magnipis an supply nin kuryente. Sa siring na sitwasyon, posibleng magkaigwa nin temporaryong pagputol nin kuryente sa nagkapirang parte kan probinsya o rehiyon tanganing mamantenir an balanse kan supply asin demand.
Pangapudan man ni Bucay sa mga consumer na mag-ingat sa paggamit nin kuryente, lalo na kun padagos an labi-labing init asin nagdadakula an demand sa kuryente.
