Pinaprayoridad ng National Irrigation Administration (NIA) Region V an pagsasalbar sa mga standing crops o mga tanom na paroy pa, sa tahaw kan epekto kan inaasip na Very Strong El Niño.
Sa intrevista kan Bombo Radyo Naga kay Engr. Gaudencio John De Vera, Regional Manager, NIA Region 5, nasa 62,000 hectares an kabuuang lawak kan mga tinanom na paroy kan Hulyo. Sa ngunyan, nasa 20 porsyento pa sana kaini an naani, mantang an natatadang 80 porsyento kan mga tinanom na paroy an padagos pang minomonitor kan ahensya tanganing masalbar sa posibleng epekto kan kakulangan nin tubig.
Dugang pa ni De Vera, nagbabagsak na an lebel nin tubig sa mga salog, arog kan Alawihaw River sa Camarines Norte, kaya mahalagang maprotektaran an mga standing crops. Target kan NIA na matapos an pag-ani kan mga paroy na ini sa Nobyembre 15, tanganing malimitahan an posibleng pagkasira kan mga pananom asin an lugi kan mga parahuma.
Para sa sunod na panahon nin pagtatanom na inaasahang masalang sa Disyembre 1, makikipagkoordinasyon an NIA sa Department of Agriculture (DA) sa pagdeterminar kan mga lugar na may igong suplay nin tubig para sa pagtatanom nin paroy.
Sa mga lugar na kulang o mayo nang tubig, isusulong an pagtatanom nin ibang high-value crops arog kan munggo, talong asin okra. Magtatabang man an DA sa pagtao nin mga binhi para sa mga alternatibong pananom.
Panginot na katuyuhan kan mga ahensya na malimitahan an epekto kan El Niño sa mga parahuma asin matabangan sindang makarekober sa masunod na panahon nin pagtatanom.
