Nagpahayag nin pagkakuriyat si Senador-Hukom Pia Cayetano sa biglaang desisyon kan House prosecution panel na bawi’on an tulong (3) sa apat (4) na articles of impeachment kontra ki Bise Presidente Sara Duterte.
Segun sa report, idiniin ni Cayetano na dapat man tawan nin supisyenteng panahon an lado kan depensa tanganing maproseso asin mapaghandaan an nangyaring pagbabago sa takbo kan impeachment trial.
Binigyang-duon man kan senador-hukom an importansya kan pagigin makatanusan sa mga paglilitis, orog na ta nakataya an reputasyon kan sarong tawo sa mga alegasyon na ipinapahayag sa korte.
Naroromdoman na nagdesisyon an House prosecution panel na ipagpadagos na sana an Article II o an alegasyon nin unexplained wealth kontra sa bise presidente. Kaiba kaini, binawi kan prosecution an Articles I, III, asin IV na nagtutukar sa umano’y salang paggamit kan confidential funds, bribery, asin grave threats.
Ipinaliwanag kan prosecution na supisyente na umano an mga ebidensyang naipresentar kaini sa Article II tanganing suportahan an saindang panawagan na mapatalsik si Duterte sa pwesto.
Mantang, maring kinontra kan defense panel an lakdang kan prosecution. Idiniin kaini na bakong makatanusan an pagbawi sa tulong (3) articles matapos maipresentar sa impeachment court asin maipaabot sa publiko an mga alegasyon na yaon digdi.
Sa ibong kan pagkontra kan depensa, inako kan impeachment court an manifestation kan prosecution na dai na kaini ipagpapadagos an tulong (3) articles.
Padagos man na nakasentro an paglilitis sa Article II, mantang nagdadanay na importanteng usipon an pagseguro na matatawan nin oportunidad an magkabilang lado na maipresentar an saindang mga argumento asin ebidensya sa impeachment proceedings.
